Novas


Os concellos de Ares, Ferrol e Neda promoven a segunda edición do Festival Teatral de Entes Animados

 Os concellos de Neda, Ares e Ferrol danse a man para poñer en marcha este ano a segunda edición do Festival Teatral de Entes Animados (FESTEA 2020). Un ciclo de espectáculos de títeres que esta mañá presentaban na Casa das Palmeiras a concelleira de Educación de Ares, Noelia Montero; a edil de Cultura de Neda, Verónica Vigo, e o director artístico do certame e representante da Asociación Titerario, Plamen Dipchikov. Arrancará este xoves 20 de agosto e prolongarase ata o 30 do mesmo mes. Respecto á edición pasada, o festival suma compañías e espectáculos. A entrada é de balde, as funcións diríxense a un público familiar e precísase inscrición previa.

Seguindo o calendario previsto, Ares convertirase este xoves no primeiro escenario do festival. A compañía andaluza Teatro de las Maravillas traerá ao xardín de A Tenencia, en Redes, a súa función “Fantoches” a partir das 20 horas. O domingo 23, ás 12,30 horas, Teatro Arboré, de Aragón, ofrecerá no paseo marítimo de Neda -nas inmediacións do Albergue- a súa obra “Títeres de Cachiporra”. Obra que repetirá a partir das 19,30 horas no parque municipal Raíña Sofía de Ferrol. Á seguinte semana, a praza da Constitución de Ares albergará o venres 28, ás 20 horas, a función “El caballero de la mano de fuego”, a cargo da Compañía de Víctor Biau, de Aragón. O ciclo concluirá o domingo 30 de agosto. No campo da Feira de Albarón Alauda Teatro de Castela e León ofrecerá a función “The Puppet Circus” ás 12,30 horas, e a mesma compañía representará “Cristóbal Purchinela” no parque municipal Raíña Sofía de Ferrol ás 19,30 horas.

Para asistir ás funcións é preciso reservar entrada: en Ares dende o luns anterior á función chamando ao teléfono da Biblioteca (981 44 80 57) e en Neda, na Casa da Cultura ou no teléfono 981 39 02 33 tamén dende o luns e ata o venres previos (de 10 a 14 horas).
 
Nesta liña, Noelia Montero lembrou o uso obrigatorio da mascarilla e abogou por actividades culturais seguras, con aforo reducido e con todas as garantías, xa que esta é, apuntou, a prioridade nestes momentos. Feito no que coincidiu Verónica Vigo, que tamén puxo en valor a unión entre os tres concellos para a posta en marcha de iniciativas que, individualmente, municipios pequenos non poderían asumir. Pola súa banda, Plamen Dipchikov subliñou a calidade e nivel dun certame que buscará en 2021 sumar novos concellos para continuar ampliando as súas posibilidades. 


Concello e panaderías acordan suspender este ano a Festa do Pan e convidar á cidadanía a participar en iniciativas vencelladas a través das redes sociais

 Concello e panaderías de Neda decidiron de común acordo suspender este ano a tradicional Festa do Pan, declarada de Interese Turístico de Galicia. Foi unha decisión moi meditada e estudada, que responde á situación actual derivada da COVID-19 e dos rebrotes que se están a producir nas últimas semanas. A necesidade de extremar as precaucións e evitar riscos levaron así á organización a pospoñer esta cita. Dunha banda, o control sobre o aforo nun espazo como o paseo marítimo antollábase practicamente imposible e en todo caso a festa perdería a súa esencia: o seu carácter popular.

Neste contexto, o Concello decidiu en todo caso manter os compromisos contraídos nas contratacións realizadas, e as actuacións que se ían programar este ano levaranse a cabo en 2021.
 
En todo caso, nin Concello nin panaderías queren renunciar á celebración e, por iso, este ano convidarán á poboación a participar de xeito virtual en dúas iniciativas de promoción do pan de Neda.
 
Dunha banda, do 4 ao 6 de setembro, porase en marcha a través das redes sociais un certame de fotografía polo que a veciñanza poderá achegar as súas imaxes da festa dende os seus inicios en Albarón ata o pasado ano. A segunda acción convidará á cidadanía a compartir as súas receitas caseiras xa sexa de pan, de empanada ou de doce.
 
Entre os participantes sortearanse 7 lotes de produtos das panaderías que participarían cun posto de venda ou aportando produtos para a súa degustación no xantar popular na Festa do Pan 2020 (La Gallega, Modesto Hermida, Germán, Santa Rita, Paca Castro Romero, J. Castro, La Nueva), valorados cada un deles en 100 euros. Nas vindeiras semanas darase cumprida información sobre as dúas iniciativas.


Bota a andar o proceso selectivo do proxecto de inserción laboral Inicia V

 Os concellos de Fene, Ares, Mugardos, Neda e Cabanas levarán a cabo a partir do 15 de setembro a quinta edición do proxecto formativo e de inserción laboral Inicia, dirixido a mocidade desempregada que queira mellorar as súas competencias de cara á súa integración no mercado laboral.

O proxecto está subvencionado pola Xunta e pola Unión Europea con fondos do FSE e a través del ofértanse 16 contratos de aprendizaxe para outras tantas mozas e mozos inscritos no programa de Garantía Xuvenil, pero tamén catro postos temporais para a dirección e a docencia do obradoiro.

O proceso selectivo empezou estes días coa solicitude ao Servizo Público de Emprego dun listado de aspirantes que cumpren os requisitos da convocatoria. Os concellos participantes xa están contactando coas persoas preseleccionadas para que acheguen antes das 23.59h. do 19 de agosto a súa solicitude formal para participar nas probas e tamén a documentación acreditativa dos méritos que se han valorar. O trámite ten que facerse no Rexistro Municipal de Fene -con cita previa-, a través da Sede Electrónica ou por calquera das vías previstas na Lei de Procedemento Administrativo Común.


O escritor Vicente Araguas presenta ante os seus veciños nedenses a novela “Través do Trebón”

 O escritor Vicente Araguas, Fillo Predilecto de Neda, presentou este martes na Casa de Cultura nedense, a súa terceira novela en galego. Unha obra titulada Través do Trebón, que vira ao redor da sublevación militar de 1936 nunha cidade cuxa vida económica depende en gran medida dos militares da súa base naval.

O autor, que estivo acompañado pola concelleira de Cultura, Verónica Vigo, e polo profesor Eduardo Fra Molinero, adiantou aos asistentes algunha pincelada do seu novo traballo. A trama retrata unha sociedade semiacomodada, cuxos habitantes asisten impasibles á inestabilidade política do momento, amoldan a súa liña de pensamento e comportamento ao devir dos acontecementos. Través do Trebón é a terceira novela de Araguas, quen destaca fundamentalmente pola súa obra poética.
 
Co obxectivo de garantir a seguridade e cumprir as medidas preventivas fronte á covid-19, o Concello limitou o aforo da presentación, á que se podía asistir tras reservar invitación. E os nedenses, unha vez máis, responderon ao escritor e completaron o reducido aforo dispoñible.


A hostalería de Neda premiará a fidelidade dos seus clientes con sorteos de agasallos

 A hostalería de Neda quere premiar a fidelidade da clientela e, con ese obxectivo, en colaboración co Concello activa a campaña “En Neda, os bares teñen premio”. Así, cada xoves dos meses de agosto e setembro -a partires desta semana-, cada establecemento entregará con cada consumición un boleto para participar no sorteo de diferentes premios.

Os locais participantes na iniciativa son os seguintes: Parrillada Harina y Brasa Gastrobar, Mesón O´Fumazo, Cervecería O Lagar, Café Bar Albarón, Bar Valencia, La Flor de Mayo e Cantina do Polideportivo do Roxal.

No mes de agosto, sortearase un lote de produtos de alimentación que costea o Concello e que inclúe un xamón, un queixo e dúas botellas de viño.  O sorteo terá lugar a finais de cada mes na propia Casa do Concello, e establecementos e Administración local publicitarán o boleto ganador.

<<  Anterior  | 3  | 4  | 5  | 6  | 7  | Seguinte  >> 



Axenda

<<  Previous | 1  | 2  | 3  | 4  | 5  | Next  >> 

Tramites online