Concello de Neda

Neda, 13 de Novembro de 2018.- O Concello de Neda pecha o próximo venres (día 16) ciclo Tempo para o Teatro coa representación da obra “As fillas bravas” a cargo da compañía Chévere. A función dará comezo ás 20.30 horas. O prezo da entrada é de 2 euros a de adultos e un a infantil. A representación terá lugar na Casa da Cultura. Trátase dunha obra en clave de humor feminista interpretada por tres mulleres que subirán ao escenario para tocar e cantar pezas, na súa maioría do repertorio tradicional galego. Con esta obra, Chévere continúa explotando as posibilidades dun teatro con perspectiva de xénero para sensibilizar á sociedade fronte á violencia machista e as desigualdades entre homes e mulleres. Desde o día 30 de setembro e ata o próximo venres terán pasado polo centro cultural un total de oito compañías de teatro da man dos ciclos Teatro en Familia e Tempo para o Teatro, dirixidos ao público infantil e de adulto, respectivamente. “Camiños”, “Planeta Ardora, “A canción do Elefante”, “Castrapo” e “As cores do tempo” foron só algunhas das pezas que atraeron o interese dos veciños de Neda durante o último trimestre do ano.

Neda, 13 de Novembro de 2018.- O Concello de Neda organiza para mañá martes, día 13, unha charla informativa sobre o bono social e a protección ante os desafiuzamentos. As instalacións da Casa das Palmeiras acollerán unha cita que dará comezo ás 19.30 horas e que será impartida por José Manuel Quiveu Lage, avogado, e Alberto Pérez Bermúdez, licenciado en Dereito. O goberno municipal invita á veciñanza a secundar coa súa asistencia unha convocatoria na que serán abordados temas de moita relevancia e dos que existen bastante descoñecemento.

Neda, 9 de Novembro de 2018.- O ciclo Tempo para o Teatro chega esta semana a súa cuarta función coa representación da obra “As cores do tempo” a cargo de Teatro da Vila, un grupo de actores non profesionais da vila de Cedeira. Será mañá sábado, día 10, na Casa da Cultura, a partir das 20.30 horas. O prezo da entrada é de 2 euros a de adultos e un a infantil.
“As cores do tempo” é unha obra escrita por Quique Vázquez, na que participan, Mercedes Díaz, Josefa Nebril, Fina Nebril, Belarmino Cheda, Elvíra Díaz, Estrella Leonardo, o mesmo Quique Vázquez e Lourdes Pérez a cargo das luces e o son.
“Nunha residencia de maiores crúzanse as vidas de Remedios e o seu fútbol, de Lines, Paco e Maribel Verdú, de Maruxa e a súa rabia, de Carmiña e Manoel, sempre Manoel…, dunha enfermeira e un enfermeiro. Vidas como as de calquera, cheas de amores que foron, son e serán, e dos que non chegaron a ser…; dos soños que non se cumpriron e dos que se transformaron en pesadelos”.
Esta programación teatral rematará o día 16 deste mes coa obra “As fillas bravas” da compa- ñía Chévere.

Neda, 8 de novembro de 2018.- Máis de dous metros de alto por outros dous de ancho son as medidas da Carta Xeométrica de Galicia que, cedida polo escritor e músico Vicente Araguas Álvarez, quedará instalada mañá de maneira permanente na biblioteca de Neda, situada na planta baixa da Casa da Cultura.
Trátase dun exemplar da primeira edición que, despois de ser sometido a un proceso de restauración levado a cabo por Jorge Juan Medín Guyatt para tratar as deterioracións propias do paso do tempo, do uso e da conservación, quedará exposto detrás dun vidro protector e acompañado de paneis informativos sobre a vida e traballo do autor, Domingo Fontán, así como un informe encadernado sobre os tratamentos de restauración para consulta do público. O investimento municipal ascendeu a uns 12.000 euros.
A entrega oficial do tamén coñecido como mapa Fontán terá lugar no transcurso dun acto que dará comezo ás oito da tarde, e no que estarán presentes, ademais do alcalde e da concelleira de Cultura, Ángel Alvariño Saavedra e Cristina Bouza respectivamente, o escritor Vicente Araguas, o restaurador Jorge Juan Medín Guyatt, o seu anterior propietario Rafael González Robatto, e Víctor Pollán Fernández, como membro da comisión técnica temporal para a celebración do 200º aniversario do inicio da carta xeométrica. Pollán Fernández impartirá unha conferencia cuxo título é “Fontán, un adiantado do século XIX”. O acto rematará coa actuación do grupo de Cantareiras Xerfa (Airiños de Fene).
Neda entrará así no exclusivo grupo de entidades e administracións públicas que están en posesión dun exemplar da Carta Xeométrica de Galicia, que tamén se atopan no museo de Trasalba, o pazo de Mariñán, o Parlamento de Galicia, a Real Academia Galega da Lingua e o pazo de Raxoi.
O mapa Fontán é unha carta xeométrica de Galicia, divida en provincias e subdividida en partidos e concellos. Está levantada e construída a escala 1:100.000, foi gravada en París por Louis Bouffard e estampada nunha ducia de pedras litográficas na imprenta M. Lémécier. Domingo Fontán dedicou 17 anos da súa vida (1817-1834) á realización dunha obra que foi o primeiro mapa feito en España con métodos científicos e medicións matemáticas. Nel aparecen localizadas as 4.000 igrexas das parroquias galegas e os accidentes xeográficos máis importantes, alcanzando un nivel de detalle que só foi superado coa aparición da fotogrametría aérea. Rematado o traballo no ano 1834, foi a propia raíña rexente María Cristina a que deu a orde de imprimilo en París.

Neda, 6 de novembro de 2018.- A Xunta de Goberno de Neda adxudicou esta semana proxectos por un importe global de 145.713,5 euros. Trátase de seis novas obras de aglomerado noutras tantas vías de comunicación e a construción da captación da Rabadeña para incrementar en 500 metros cúbicos máis de auga o volumen da subministración que chega á veciñanza a través da rede municipal. O consumo medio diario da localidade é de 1.100 m3.
A traída de auga foi contratada por 26.358,59 euros e será executada en tres semanas, prazo que comeza a contar a partir da sinatura do contrato. O executivo local considera probable que este novo subministro poida entrar en servizo antes de que finalice o ano e destaca a importancia desta actuación porque con ela evitarase o bombeo que agora se fai desde o río Belelle e que representa un consumo eléctrico de relevancia.
O resto do investimento aprobado, case 120.000 euros, dará lugar á pavimentación, a base de aglomerado en quente, dos camiños de Ladeiro, Currás, Latedo-Carballal, Nogueido-Coruxa-Combarro, Os Pazos-Combarro e Roseira-Pavillón de San Isidro. A intervención no vial de Ladeiro financiarase con cargo ao POS Adicional 2018 e o resto coa aportación directa do Concello de Neda por medio dun complemento de crédito.
O prazo de execución destas obras é dun mes. O goberno municipal só está á espera da firma dos contratos e da mellora da meteoroloxía para o inicio das obras que tamén deberán estar rematadas antes de final do ano.