Novas


NOVE COMPARSAS E DOUS GRUPOS TOMARÁN PARTE NO FESTIVAL DE ENTROIDO DO DÍA 1 DE MARZO

Neda, 14 de febreiro de 2019.- O Festival de Comparsas promovido polo Concello de Neda con motivo do Entroido reuniu a un total de nove comparsas e dous grupos. Así, as agrupacións que tomarán parte na cita do día 1 de marzo son: “Troupele troupele”, “Xoaniñas de Chao”, “Os Colludos”, “Vide vindo”, “A Canteira”, “Os Trastos”, “A Revolta”, “Os Parrandolos”, “Os Argalleiros” e os grupos “Os Tiquismiquis” e “Semente”. Deles, nove tamén se encargarán da animación, entre as 18.00 e 20.00 horas, nas zonas e barrios que determine a organización coa finalidade de impulsar a participación da veciñanza nas Festas do Entroido. A administración local repartirá máis de 3.000 euros entre as formacións participantes nunha actividade que dará comezo ás oito da tarde, na zona da antiga estrada da Estación (Avenida Castelao), e que rematará no pavillón polideportivo coas preceptivas actuacións.
O Concello establece un total de tres galardóns, que se concederán ás comparsas que obteñan a máis alta puntuación. As actuacións consistirán nun pase único de dúas cancións e cunha duración máxima de oitos minutos. O xurado valorará desde a orixinalidade da vestimenta ata a animación na rúa e as letras das cancións. Estas teñen que estar obrigatoriamente escritas en galego e, un dos temas a interpretar, terá que gardar relación con Neda ou algún dos seus persoeiros máis coñecidos.



NEDA ORGANIZA UN OBRADOIRO PARA QUE A VECIÑANZA APRENDA A COIDAR A SÚA ALIMENTACIÓN

Neda, 12 de febreiro de 2019.- O Concello de Neda organiza para o próximo sábado (día16) un obradoiro de Alimentación Saudable impartido pola doutora Fernanda Cienfuegos Díaz. A participación é gratuíta e a Casa da Cultura acollerá esta iniciativa, que dará comezo ás 17.00 horas. Seis son os apartados que Cienfuegos Díaz abordará durante o encontro e son os seguintes:
Alimentación axeitada, Equilibrio calórico, Alimentación e exercicio, Hidratación, Alimentación e patoloxías e Alimentación infantil.
A celebración desta convocatoria enmárcase dentro da programación coa que o goberno municipal quere contribuír ao benestar físico dos veciños e veciñas coidando a súa alimentación. Por esa razón, tanto desde área de Deportes como desde o executivo local invítase á veciñanza a secundar coa súa asistencia esta iniciativa municipal que vai máis aló do feito de adelgazar.



EDA URXE Á XUNTA E AO ESTADO A EMITIR OS INFORMES SECTORIAIS AÍNDA PENDENTES DO PXOM

Neda, 7 de febreiro de 2019.- O goberno de Neda urxe á Xunta e mesmo ao Estado a emitir os informes sectoriais que restan para avanzar na tramitación do Plan Xeral de Ordenación Municipal. A demanda responde a un acordo adoptado por unanimidade na última comisión informativa de Urbanismo e obedece á necesidade de axilizar a redacción dun plan para inmediatamente despois abrir un novo procedemento de contratación. No seu día, o Concello viuse na obriga de rescindir o contrato que tiña coa empresa Altais polos problemas económicos que estaba a atravesar. Entre os informes aínda pendentes atópanse os que deben emitir Augas de Galicia, a Dirección Xeral de Medio Rural de Montes, Portos de Galicia e Fomento. Algunhas asociacións e ata o Obispado tamén están chamados a participar no proceso. Desde o executivo local se recoñece que o PXOM segue a ser unha prioridade para o Concello de Neda, ao tempo que tamén se recorda o atranco que supuxo para as previsións iniciais do Concello o feito de ter que rescindir o acordo coa empresa inicialmente contratada. A día de hoxe, a administración local dispón dun documento que no mes de setembro do ano 2014 resultaou aprobado, de maneira provisional, pola corporación municipal. Por esta razón, o executivo local considera urxente axilizar ao máximo todos os trámites para que o municipio poida dispoñer dun plan que se axuste ás súas características e contribúa ao futuro social e económico de Neda. NEDA URGE A LA XUNTA Y AL ESTADO A EMITIR LOS INFORMES



NEDA PRESENTA O LIBRO “LOS SOLDADOS DEL TERCIO NORTE Y LAS TRES ESPAÑAS EN LA GUERRA DE CUBA

Neda, 6 de febreiro de 2019.- O goberno de Neda invita á veciñanza a asistir o próximo venres, día 8, á presentación do libro “Los soldados del Tercio Norte y las Tres Españas en la Guerra de Cuba”, do que é autora Ana Isabel Bello Platas (Serantes, Ferrol 1976). O acto dará comezo ás 20.30 horas e terá lugar na Casa das Palmeiras.

 

Ademais da escritora, xa ten confirmada a súa asistencia a concelleira de Cultura, Cristina Bouza Bellón. A autora utiliza como fío condutor o testemuño de Jerónimo Blanco, soldado de Infantería de Marina ferido na guerra de Cuba, para contextualizar un feito histórico e interpretar os acontecementos que tiveron lugar en Piedra Picada (Cuba), divulgando datos inéditos sobre os homes que no ano 1895 formaban parte da dotación do cuartel de Nuestra Señora de los Dolores del Tercio Norte de Ferrol.

 

Ana Isabel Bello Platas é licenciada e doutora en Historia pola Universidade de Santiago de Compostela, relatora en moi diferentes foros e articulista nas revistas “deNeda” e “Gallaecia”. A autora de “Los soldados del Tercio Norte y las Tres Españas en la Guerra de Cuba” tamén ten editado artigos sobre a antiga fábrica de moedas de Xuvia con motivo da celebración do XIII Congreso Nacional de Numismática “Moneda e Arqueología” celebrado en Cádiz e do XV Congreso Nacional acontecido no ano 2014 en Madrid.

 

Ademais do libro que se presentará este venres en Neda, Ana Isabel Bello tamén é autora dos seguintes títulos: “La Ceca de Juvia. La última fábrica de la moneda de Galicia”, “La fabricación de fusiles en la ría de Ferrol”, e “La capilla de Serantes”, editados por Embora, e “A enerxía do planeta” e “El pazo Libunca” editados polo Concello de Narón. Servicios Gráficos é a editorial que está detrás do traballo que se dará a coñecer o día 8.



NEDA MANTERÁ ABERTO ATA O VENRES O PRAZO PARA PARTICIPAR NA TERCEIRA ANDAINA TURÍSTICA

Neda, 5 de febreiro de 2019.- O Concello de Neda manterá aberto ata o venres, día 8, o prazo de inscrición para tomar parte na terceira Andaina Turística que, organizada pola administración local, terá lugar o día 10 e levará aos participantes a percorrer a parroquia de Anca, incluído o monte de Louseira.

 

Os interesados poden inscribirse de maneira presencial ou ben vía telefónica nas oficinas do Concello (981 380 039) e mesmo na casa da Cultura (981 390 233). A participación é gratuíta. A saída está prevista para as dez da mañá e, nesta ocasión, terá como punto de partida e de chegada a igrexa parroquial de San Pedro de Anca.

 

O programa, co que o goberno municipal quere dar a coñecer a riqueza paisaxística e patrimonial do concello, rematará o día 24 deste mes cunha saída polo casco histórico da vila.


<<  Anterior  | 1  | 2  | 3  | 4  | 5  | Seguinte  >>