Novas


Domingos de “Teatro en familia” en Neda

 O Concello de Neda programa Teatro en Familia. Un ciclo que arrancará este domingo ás 18,30 horas coa compañía Teatro Avento Produccións e o seu último espectáculo “Ummm. Unha comedia musical para chuparse os dedos”. A partir de entón, as funcións continuarán no salón de actos da Casa da Cultura todos os domingos ata o último do mes de outubro. O ciclo inclúese no programa Cultura no Camiño da Xunta de Galicia e conta tamén co apoio da Deputación provincial.

As entradas para cada un dos espectáculos terán un custe dun euro para o público infantil e de dous para o adulto e sairán á venda a mesma semana de cada función. Poderanse adquirir na Casa da Cultura de martes a venres de 9 a 13 e de 16 a 20 horas. Así, para a función deste domingo o prazo ábrese mañá, 22 de setembro. Ademais, os espectáculos desenvolveranse baixo un estrito protocolo de prevención fronte á covid-19, as prazas son limitadas e os menores deben ir acompañados dunha soa persoa adulta por unidade familiar, deixando así máis prazas para os máis pequenos.

O calendario completarase coas obras “Canta miña pedra, canta” a cargo de Xoán Curiel e Charo Pita o domingo 4 de outubro (12,30 h); “Ela”, de Caramuxo Teatro o domingo 11 de outubro (18,30 h), e “UP 2 DOWN” de Traspediante Danza o domingo 25 de outubro (18,30 h). 


Sesión de contacontos para bebés de ata 3 anos este venres na Casa da Cultura de Neda

 O Concello de Neda inaugura a súa programación cultural de outono con dúas sesións de contacontos dirixidos aos máis pequenos e pequenas da casa. Celebraranse seguindo un protocolo específico de prevención fronte á covid-19 e terán por escenario o salón de actos da Casa da Cultura co fin de garantir as distancias interpersoais. As sesións son gratuítas e a primeira terá lugar este venres ás 18 horas: “Paxariños” de Trinketrinke Teatro. Para asistir é preciso inscribirse previamente entre mañá mércores e o mesmo venres, de 9 a 13 e de 16 a 20 horas na Biblioteca ou chamando ao 981 39 02 33.

As prazas están limitadas a 10 nenos e nenas e deberán estar acompañados dunha persoa adulta por unidade familiar.

“Paxariños” está dirixida a nenos e nenas de ata 3 anos. Trátase dun contacontos para bebés fundamentado nunha posta en escea moi visual: un ovo xigante do que nacerá un paxariño, un conto sinxelo e sonoro que lembra cantareiras infantís.
 
Ao venres seguinte, á mesma hora e no mesmo escenario, Trécola Teatro ofrecerá a súa obra “Sen medo” para nenos e nenas de 4 a 9 anos.
 
As sesións inclúense no programa Ler conta moito da Rede de Bibliotecas de Galicia da Xunta de Galicia.


Novos horarios da Biblioteca a partir deste luns

 A partir deste luns, 14 de setembro, a Biblioteca Municipal de Neda abrirá as súas portas con novo horario ampliado. Así, veciños e veciñas poderán acceder ás instalacións de luns a venres de 9 a 13 horas e de 16 a 20 horas.  



A unificación de cursos imposta por Educación no CEIP San Isidro impide manter as distancias de seguridade fronte á covid

 A comunidade educativa do CEIP San Isidro realizou esta mañá un acto reivindicativo nas aulas para demandar da Consellería de Educación que cubra a praza vacante cun mestre/a en 3º de Educación Primaria. Unha praza contemplada no catálogo de postos do centro que evitaría unificar as aulas de 2º e 3º tal e como vén imposto dende a administración educativa. Con esa decisión de Educación, os nenos e nenas desta aula non cumpren as distancias de seguridade establecidas como medida de prevención fronte á covid-19. Así o constataron hoxe pais, nais, docentes e concelleiros do goberno municipal, que se uniron ao acto celebrado esta mañá. Cada un deles ocupou un pupitre, amosando ás claras o escaso marxe entre as mesas.

Un problema de fácil solución: a incorporación do/a mestre/a que lle corresponde ao centro por ratio. Así mesmo, o espazo non sería un problema, xa que ao unificar cursos unha das aulas quedou completamente baleira. A maiores, dende a comunidade educativa non se entende esa unificación porque ademáis de agrupar diferentes cursos e idades, estase a agrupar dous niveis diferentes. Así, a carga horaria das diferentes materias non coincide.

Ademais, a comunidade educativa solicita un/ha profesor/a de apoio, xa que a incorporación dun novo alumno con necesidades especiais nesa aula unificada obriga a unha atención permanente que agora deberá asumir o centro co persoal existente, e que non é suficiente.
 
A comunidade educativa do CEIP xa trasladou a situación á Xefatura Territorial e continuará reiterando os seus escritos.


Arranca o curso na Escola Infantil Municipal marcado polas medidas de prevención fronte á covid

 Nove nenas e nenos iniciaron esta mañá o novo curso na Escola Infantil Municipal Os Pelegríns de Neda. As medidas de prevención fronte á covid-19 marcaron esta primeira xornada, xa que os máis pequenos e pequenas terán que acostumarse a novos hábitos. Entre outros, a toma de temperatura nada máis acceder á entrada e a retirada de calzado por outro que permanecerá sempre no centro. Tamén, despedirse antes das familias, xa que estas non poden agora acceder ás instalacións. Habilitouse un espazo para esa despedida entre pais e crianzas na entrada, que se fará de xeito escalonado. Na fase de adaptación, a partir das 9 horas e, unha vez superada esta, que depende do ritmo que marquen nenas e nenos, a partir das 8 horas.

No interior, os dispensadores de hidroxel acompañarán aos menores, xa que a desinfección de mans será constante, ao igual que a limpeza dos diferentes elementos de xogo. Ademais, prestarase especial atención á ventilación dos espazos, rotando as actividades entre un e outro.

A diario, procederase á desinfección do parque exterior e do camiño de entrada. Precisamente, aproveitarase ao máximo esa zona exterior axardinada coa que conta o inmoble para desenvolver as actividades do día a día.
 
Un servizo de conciliación que este ano experimentou unha caída na matriculación respecto a anos precedentes, cando a media se situaba nos 20 alumnos e alumnas, e que se explica pola nova normalidade imposta pola covid-19. 

<<  Anterior  | 1  | 2  | 3  | 4  | 5  | Seguinte  >> 



Axenda

<<  Previous | 1  | 2  | 3  | 4  | 5  | Next  >> 

Tramites online